Max Blecher: Hendingar i den umiddelbare uverkelegheita

100 nummererte eksemplar, 2023 UTSELD

Omsetting og bokdesign: David Aasen
Framsidefoto: Linn Pedersen ("Utflukt", 2021)
Papir: Munken Premium Cream 115 g
Trykk og innbinding: Merkur Grafisk AS

Sider: 202
 

Întâmplări în irealitatea imediată, som er den rumenske originaltittelen på denne boka, blei utgitt i 1936. Med Hendingar i den umiddelbare uverkelegheita blir eit verk av Max Blecher (1909–1938) for første gong publisert på norsk. Omsettinga er gjort med den svenske omsettinga til Inger Johansson som grunnlag, og med hennar løyve. Händelser ur den omedelbara overkligheten blei utgitt i 2010 på Bokförlaget h:ström – Text & Kultur. Den engelske omsettinga ved Michael Henry Heim, Adventures in immediate irreality (2015), er også blitt konsultert. Takk til Sindre Ekrheim, som introduserte meg for Max Blecher, og takk til Inger Johansson, Oda Malmin, Linn Pedersen, Line Omland Eilevstjønn og Mari Reinholt Aas.

​

*

​

Max Blecher, son av ein jødisk handelsmann og butikkeigar, blir fødd 8. september 1909 i Botoșani, Romania. Etter studenteksamen i 1927 reiser han til Paris for å studere medisin. I 1928 blir han, 19 år gammal, råka av skjelettuberkulose og må avbryte studia. Han blir sengebunden dei siste ti åra av livet sitt, og søker behandling på ulike sanatorium rundt om i Europa: Berck i Frankrike, Leysin i Sveits og i Techirghiol ved den rumenske svartehavskysten.

​

Trass i sjukdommen skriv han nokre av Romanias mest interessante tekstar. Han debuterer som prosaist i 1930 med novella «Herrant» i Tudor Arghezis tidsskrift Bilete de papagal, han skriv i André Bretons litteraturtidsskrift Le Surréalisme au service de la révolution og brevvekslar intenst, blant anna med Breton, André Gide, Martin Heidegger, Ilarie Voronca, Geo Bogza, Sașa Pană og Mihail Sebastian. I 1934 gir Blecher ut diktsamlinga Corp transparent («Gjennomsynleg kropp»). Han publiserer kortprosa og essay (om poesi, filosofi og kunst, om Blake og Kierkegaard) i ulike tidsskrift.

​

I 1935 flyttar han til eit hus i utkanten av byen Roman i regionen Moldova, der han skriv romanane Întâmplări în irealitatea imediată (Hendingar i den umiddelbare uverkelegheita) og Inimi cicatrizate (eng. Scarred hearts), som blir gitt ut i București i 1936. Blecher døyr den 31. mai 1938 i Roman, 28 år gammal.

 

Sanatoriedagboka Vizuina luminată: Jurnal de sanatoriu («Opplyst hole») blir publisert posthumt, først delvis i 1947, deretter komplett i 1971. Samleutgåva M. Blecher, Întâmplări în irealitatea imediată; Inimi cicatrizate kom i 1999, den inneheld også diktsamlinga Corp transparent, i tillegg til introduksjon, korrespondanse og nyskriven kritikk. Max Blecher, mai puțin cunoscut («Den ukjente Max Blecher») kjem i 2000, og inneheld all brevveksling og resepsjonshistorie. I 2016 kjem filmatiseringa av Inimi cicatrizate (Scarred hearts), regissert av Radu Jude.

​

Blecher har blitt omsett sidan midten av 70-åra, og er så langt tilgjengeleg på fransk, tysk, spansk, tsjekkisk, ungarsk, nederlandsk, svensk, dansk, italiensk, estlandsk, gresk, portugisisk, tyrkisk, polsk og engelsk. Og no også norsk.